0:00
/
1ܐܝܼܢܵܐ ܝܼܫܘܿܥ: ܟܲܕ ܡܸܠܝܵܐ ܪܘܼܚܵܐ ܕܩܘܼܕܫܵܐ: ܕܸܪܹܗ ܡ̣ܢ ܝܘܿܪܕܢܵܢ: ܘܦܸܫܠܹܗ ܠܘܼܒܠܵܐ ܒܪܘܼܚܵܐ ܠܒܲܪܝܼܵܐ. 2ܐܲܪܒܥܝܼ ܝܵܘܡܵܢܹ̈ܐ: ܟܲܕ ܦܵܐܹܫ ܗ݇ܘܵܐ ܓ̰ܘܼܪܒܵܐ ܡ̣ܢ ܐܵܟܹܠܩܲܪܨܵܐ. ܘܠܵܐ ܐܟܸܠܹܗ ܡܸܢܕܝܼ ܒܐܵܢܝܼ ܝܵܘܡܵܢܹ̈ܐ: ܘܟܲܕ ܬܸܡܠܗܘܿܢ ܟܦܸܢܹܗ. 3ܘܐَܡܝܼܪܹܗ ܐܸܠܹܗ ܐܵܟܹܠܩܲܪܨܵܐ: ܐܸܢ ܒܪܘܿܢܹܗ ܕܐܲܠܵܗܵܐ ܝܘܸܬ: ܐَܡܘܿܪ ܠܐܵܗܵܐ ܟܹܐܦܵܐ ܕܗܵܘܹܐ ܠܲܚܡܵܐ. 4ܓ̰ܘܼܘܸܒܠܹܗ ܝܼܫܘܿܥ ܐܸܠܹܗ: ܟܬܝܼܒ̣ܵܐ ܝܠܹܗ: ܕܠܵܐ ܒܠܲܚܡܵܐ ܒܢܲܦ̮ܫܹܗ ܟܹܐ ܚܲܝܹܐ ܒܲܪܢܵܫܵܐ. 5ܘܡܘܼܣܸܩܠܹܗ ܐܵܟܹܠܩܲܪܨܵܐ ܠܛܘܼܪܵܐ ܪܵܡܵܐ: ܘܡܘܼܚܙܹܐܠܹܗ ܟܠܵܝܗܝ ܡܲܠܟܘܵܬܹ̈ܐ ܕܐܲܪܥܵܐ ܒܛܲܪܦܲܛܬܵܐ ܕܥܲܝܢܵܐ. 6ܘܐَܡܝܼܪܹܗ ܐܸܠܹܗ ܐܵܟܼܸܠܩܲܪܨܵܐ: ܐܸܠܘܼܟܼ ܒܸܬ ܝܵܗَܒܸܢ ܐܵܗܵܐ ܗܘܼܟܡܵܐ ܟܠܹܗ ܘܚܸܩܪܵܝܗܝ: ܣܵܒܵܒ ܕܒܝܼܝܼ ܣܘܼܦܝܵܐ ܝܠܹܗ: ܘܠܡ̇ܢ ܕܒܵܥܹܝܢ ܟܹܐ ܝܵܗَܒܸܢܹܗ. 7ܐܸܢ ܗܲܕܟ̣ܵܐ ܐܲܢَܬ ܣܵܓ̣ܕܸܬ ܩܵܕَܡܝܼ: ܕܝܼܘܼܟ ܒܸܬ ܗܵܘܹܐ ܟܠܹܗ. 8ܐܝܼܢܵܐ ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܹܗ: ܟܬܝܼܒ̣ܵܐ ܝܠܹܗ: ܠܡܵܪܝܵܐ ܐܲܠܵܗܘܼܟ ܣܵܓ̣ܕܸܬ: ܘܐܸܠܹܗ ܒܢܲܦ̮ܫܹܗ ܦܵܠܚܸܬ. 9ܘܡܘܼܬَܝܹܠܹܗ ܠܐܘܿܪܸܫܠܸܡ: ܘܡܘܼܟܠܹܐܠܹܗ ܥܲܠ ܟܸܢܦܵܐ ܕܗܲܝܟܠܵܐ: ܘܐَܡܝܼܪܹܗ ܐܸܠܹܗ: ܐܸܢ ܒܪܘܿܢܹܗ ܕܐܲܠܵܗܵܐ ܝܘܸܬ: ܪܲܦܝܼ ܓܵܢܘܼܟ ܡܐܲܟ̣ܵܐ ܠܐܸܠܬܸܚ. 10ܣܵܒܵܒ ܕܟܬܝܼܒ̣ܵܐ ܝܠܹܗ: ܠܡܲܠܲܐܟ̣ܘܼ̈ܗܝ ܒܸܬ ܦܵܩܸܕ ܥܲܠܘܼܟܼ: ܕܢܵܛܪܝܼ ܠܘܼܟܼ. 11ܘܥܲܠ ܐܝܼܕܵܬܵܝ̈ܗܝ ܒܸܬ ܫܵܩܠܝܼ ܠܘܼܟܼ: ܠܵܐ ܗَܘܹܐ ܕܡܵܚܸܬ ܒܟܹܐܦܵܐ ܐܲܩܠܘܼܟܼ. 12ܐܝܼܢܵܐ ܝܼܫܘܿܥ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܹܗ: ܐَܡܝܼܪܵܐ ܝܠܹܗ: ܠܵܐ ܓ̰ܵܪܒܸܬ ܠܡܵܪܝܵܐ ܐܲܠܵܗܘܼܟ. 13ܘܟܲܕ ܬܘܼܡܸܡܠܹܗ ܐܵܟܹܠܩܲܪܨܵܐ ܟܠ ܓ̰ܘܼܪܵܒܘܼܗܝ: ܦܪܸܩܠܹܗ ܡ̣ܢ ܠܟܸܣܠܹܗ ܗܲܠ ܙܲܒ̣ܢܵܐ. 14ܘܕܸܪܹܗ ܝܼܫܘܿܥ ܒܚܲܝܠܵܐ ܕܪܘܼܚܵܐ ܠܓܠܝܼܠܵܐ: ܘܦܠܸܛܠܵܗ̇ ܒܘܼܬ ܕܝܼܹܗ ܒܟܠܹܗ ܐܲܬܪܵܐ: ܕܚܵܕܸܪ̈ܘܵܢܵܝܗܝ. 15ܘܡܵܠܸܦ ܗ݇ܘܵܐ ܒܟܢܘܼܫܝܵܬܵܝ̈ܗܝ: ܘܦܵܐܹܫ ܗ݇ܘܵܐ ܚܩܝܼܪܵܐ ܡ̣ܢ ܟܠܵܝܗܝ. 16ܘܐَܬܹܐܠܹܗ ܠܢܵܨܪܲܬ: ܐܲܝܟܵܐ ܕܦܸܫܠܹܗ ܓܘܼܪܘܸܣܵܐ: ܘܥܒܸܪܹܗ ܕܵܐܟ̣ܝܼ ܕܐܝܼܬ ܗ݇ܘܵܐ ܠܹܗ ܥܵܕܲܬ: ܠܟܢܘܼܫܬܵܐ ܒܝܵܘܡܵܢܹ̈ܐ ܕܫܲܒܬܵܐ: ܘܩܸܡܠܹܗ ܠܸܩܪܵܝܵܐ. 17ܘܦܸܫܠܹܗ ܝܘܼܗَܒ̣ܵܐ ܐܸܠܹܗ ܟܬܵܒ̣ܵܐ ܕܐܹܫܲܥܝܵܐ ܢܒ̣ܝܼܵܐ. ܘܦܬܸܚܠܹܗ ܟܬܵܒ̣ܵܐ: ܘܡܘܼܫَܟ̰ܸܚܠܹܗ ܕܘܼܟܬܵܐ ܐܲܝܟܵܐ ܕܝܼܗ݇ܘܵܐ ܟܬܝܼܒ̣ܵܐ. 18ܪܘܼܚܹܗ ܕܡܵܪܝܵܐ ܥܲܠܝܼ: ܣܵܒܵܒ ܕܩܲܡ ܡܵܫܸܚ ܠܝܼ ܠܡܲܫܚܘܼܕܹܐ ܠܡܸܣܟܹܢܹ̈ܐ: ܘܫܘܼܕܪܸܢܹܗ 19ܠܡܲܟܪܘܿܙܹܐ ܠܝܲܚܣܝܼܪܹ̈ܐ ܫܒ̣ܵܩܵܐ: ܘܠܣܸܡܝܹ̈ܐ ܚܙܵܝܵܐ: ܘܠܸܫܪܵܝܵܐ ܠܬܒ̣ܝܼܪܹ̈ܐ ܒܫܒ̣ܵܩܵܐ: ܘܠܡܲܟܪܘܼܙܹܐ ܫܹܢَܬܵܐ ܩܘܼܒܸܠܬܵܐ ܕܡܵܪܝܵܐ. 20ܘܟܪܸܟ̣ܠܹܗ ܟܬܵܒ̣ܵܐ ܘܝܘܼܗَܒܼܸܠܹܗ ܠܚܸܠܡܲܬܟܵܪ: ܘܝܬܸܒ̣ܠܹܗ. ܘܟܠܵܝܗܝ ܐܵܢܝܼ ܕܓܵܘ ܟܢܘܼܫܬܵܐ ܥܲܝܢܝܼ̈ ܒܸܚܝܵܪܵܐ ܗ݇ܘܵܘ ܒܝܹܗ. 21ܘܫܘܼܪܹܐܠܹܗ ܠܹܐܡܵܪܵܐ ܐܸܠܵܝܗܝ: ܐܸܕܝܘܿܡ ܦܸܫܠܹܗ ܬܘܼܡܸܡܵܐ ܐܵܗܵܐ ܟܬܵܒ̣ܵܐ ܒܢܵܬܝܵܬܵܘ̈ܟ̣ܘܿܢ. 22ܘܝܵܗَܒ̣ܝܼ ܗ݇ܘܵܘ ܣܵܗܕܘܼܬܵܐ ܐܸܠܹܗ ܟܠܵܝܗܝ: ܘܥܵܓ̰ܒܝܼ ܗ݇ܘܵܘ ܒܗܹܡܸܙܡܵܢܹ̈ܐ ܕܫܵܦܵܩܲܬ ܕܦܵܠܛܝܼ ܗ݇ܘܵܘ ܡ̣ܢ ܦܘܼܡܹܗ: ܘܐܵܡܪܝܼ: ܠܹܐ ܝܠܹܗ ܐܵܗܵܐ ܒܪܘܿܢܵܐ ܕܝܵܘܣܸܦ. 23ܐܵܡܸܪ ܐܸܠܵܝܗܝ: ܐܲܠܒܲܬܵܐ ܒܸܬ ܐܵܡܪܝܼܬܘܿܢ ܐܸܠܝܼ ܐܵܗܵܐ ܡܵܣܵܠܵܐ: ܗܲܟܝܼܡ: ܒܵܣܸܡ ܓܵܢܘܼܟ: ܟܠܵܝܗܝ ܕܫܡܸܥܠܲܢ ܥܒ̣ܝܼܕܹܐ ܓܵܘ ܟܦܲܪܢܵܚܘܿܡ: ܥܒ̣ܘܿܕ ܐܘܼܦ ܠܲܐܟ̣ܵܐ ܓܵܘ ܡܕܝܼܢَܬܘܼܟ. 24ܘܐَܡܝܼܪܹܗ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܲܝܬ ܢܒ̣ܝܼܵܐ ܕܦܵܐܹܫ ܩܘܼܒ̇ܠܵܐ ܓܵܘ ܐܲܬܪܹܗ. 25ܣܵܒܵܒ ܒܣܲܪܲܣܬܘܼܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܪܵܒܵܐ ܐܲܪ̈ܡܸܠܝܵܬܹܐ ܐܝܼܬ ܗ݇ܘܵܘ ܓܵܘ ܝܼܣܪܵܝܹܠ ܒܝܵܘܡܵܢܹ̈ܐ ܕܐܹܠܝܼܵܐ: ܟܲܕ ܦܸܫܠܗَܘܿܢ ܕܒ̣ܝܼܩܹܐ ܫܡܲܝܵܐ ܬܠܵܬَ ܫܸܢܹ̈ܐ ܘܐܸܫܬܵܐ ܝܲܪ̈ܚܹܐ: ܟܲܕ ܗَܘܹܐܠܹܗ ܟܸܦܢܵܐ ܓܘܼܪܵܐ ܒܟܠܵܗ̇ ܐܲܪܥܵܐ. 26ܘܠܟܸܣ ܚܕܵܐ ܡܸܢܵܝܗܝ ܠܵܐ ܦܸܫܠܹܗ ܫܘܼܕܪܵܐ ܐܹܠܝܼܵܐ: ܐܸܠܵܐ ܠܨܲܪܦܲܬ ܕܨܲܝܕܘܿܢ: ܠܟܸܣ ܒܲܟ̣ܬܵܐ ܐܲܪܡܸܠܬܵܐ. 27ܘܪܵܒܵܐ ܓܸܪ̈ܒ̣ܵܢܹܐ ܐܝܼܬ ܗ݇ܘܵܘ ܓܵܘ ܝܼܣܪܵܝܹܠ ܒܝܵܘܡܵܢܹ̈ܐ ܕܐܹܠܝܼܫܲܥ ܢܒ̣ܝܼܵܐ: ܘܚܲܕَ ܡܸܢܵܝܗܝ ܠܵܐ ܦܸܫܠܹܗ ܕܘܼܟ̣ܝܵܐ: ܐܸܠܵܐ ܢܲܥܡܵܢ ܐܵܪܵܡܵܝܵܐ. 28ܘܟܲܕ ܫܡܸܥܠܗَܘܿܢ ܐܲܢܹܐ ܐܵܢܝܼ ܕܓܵܘ ܟܢܘܼܫܬܵܐ: ܦܸܫܠܗَܘܿܢ ܡܸܠܝܹܐ ܟܲܪܒܵܐ ܟܠܵܝܗܝ. 29ܘܩܸܡܠܗَܘܿܢ ܦܘܼܠܸܛܠܗܘܿܢ ܐܸܠܹܗ ܠܒܲܕܲܪ ܡ̣ܢ ܡܕܝܼܢَܬܵܐ: ܘܡܘܼܬَܝܹܠܗܘܿܢ ܐܸܠܹܗ ܗܲܠ ܓܒ̣ܝܼܢܵܐ ܕܛܘܼܪܵܐ: ܗ̇ܘ ܕܡܕܝܼܢَܬܵܝܗܝ ܒܢܝܼܬܵܐ ܗ݇ܘܵܐ ܥܲܠܘܼܗܝ: ܕܪܲܦܝܼ ܗ݇ܘܵܘ ܠܹܗ ܠܐܸܠܬܸܚ. 30ܐܝܼܢܵܐ ܗ̇ܘ ܥܒܸܪܹܗ ܒܓܵܘܵܝܗܝ ܘܐَܙܸܠܹܗ. 31ܘܨܠܹܐܠܹܗ ܠܟܦܲܪܢܵܚܘܿܡ: ܡܕܝܼܢَܬܵܐ ܕܓܠܝܼܠܵܐ: ܘܡܵܠܸܦ ܗ݇ܘܵܐ ܠܗ݇ܘܿܢ ܒܫܲܒܵܬܹ̈ܐ. 32ܘܥܵܓ̰ܒܝܼ ܗ݇ܘܵܘ ܒܝܘܼܠܦܵܢܹܗ: ܣܵܒܵܒ ܗܹܡܸܙܡܵܢܹܗ ܒܗܘܼܟܡܵܐ ܗ݇ܘܵܐ. 33ܘܐܝܼܬ ܗ݇ܘܵܐ ܓܵܘ ܟܢܘܼܫܬܵܐ ܐ݇ܢܵܫܵܐ ܕܐܝܼܬ ܗ݇ܘܵܐ ܠܹܗ ܪܘܼܚܵܐ ܕܕܲܝܘܵܐ ܛܲܡܵܐܐ: ܘܡܘܼܩܘܸܚܠܹܗ ܒܩܵܠܵܐ ܪܵܡܵܐ. 34ܫܒ̣ܘܿܩ: ܡܵܐ ܠܘܼܟܼ ܡܸܢܲܢ: ܝܼܫܘܿܥ ܢܵܨܪܵܝܵܐ: ܐܬܹܠܘܿܟ ܠܬܵܠܘܿܩܲܢ: ܒܝܼܕܲܥܝܘܼܟ ܝܼܘܸܢ ܡܵܢܝܼ ܝܘܸܬ: ܩܲܕܝܼܫܹܗ ܕܐܲܠܵܗܵܐ. 35ܘܢܓ̰ܘܼܠܹܗ ܒܝܹܗ ܝܼܫܘܿܥ: ܘܐَܡܝܼܪܹܗ: ܫܬܘܿܩ: ܘܦܠܘܿܛ ܡܸܢܹܗ. ܘܪܘܼܦܹܠܹܗ ܕܲܝܘܵܐ ܒܒܹܝܦܲܠܓܵܐ: ܘܦܠܸܛܠܹܗ ܡܸܢܹܗ: ܟܲܕ ܠܵܐ ܥܒܸܕܠܹܗ ܙܵܪܵܪ ܡܸܢܕܝܼ ܒܝܹܗ. 36ܘܥܘܼܓ̰ܵܒܵܐ ܕܒܸܩܠܹܗ ܠܟܠܵܝܗܝ: ܘܗܲܡܙܘܼܡܝܼ ܗ݇ܘܵܘ ܚܲܕَ ܥܲܡ ܕܗ̇ܘ ܐ݇ܚܹܪ݇ܢܵܐ: ܒܹܐܡܵܪܵܐ: ܡܘܼܕܝܼ ܝ݇ܠܵܗ̇ ܐܵܗܵܐ ܗܹܡܸܙܡܵܢ: ܕܒܗܘܼܟܡܵܐ ܘܒܚܲܝܠܵܐ ܒܸܦܩܵܕܵܐ ܝܠܹܗ ܠܪ̈ܘܼܚܹܐ ܛܲܡܹ̈ܐܐ: ܘܒܸܦܠܵܛܵܐ ܝܢܵܐ. 37ܘܦܠܸܛܠܵܗ̇ ܒܵܗَܣܹܗ ܒܟܠ ܕܘܼܟܵܐ ܕܚܵܕܸܪ̈ܘܵܢܵܝܗܝ. 38ܘܟܲܕ ܦܠܸܛܠܹܗ ܡ̣ܢ ܟܢܘܼܫܬܵܐ: ܥܒܸܪܹܗ ܠܒܲܝܬܹܗ ܕܫܸܡܥܘܿܢ. ܘܚܡܵܬܹܗ ܕܫܸܡܥܘܿܢ ܡܘܼܠܝܸܨܬܵܐ ܗ݇ܘܵܐ ܒܐܫܵܬܵܐ ܓܘܼܪܬܵܐ: ܘܒܥܹܐܠܗܘܿܢ ܡܸܢܹܗ ܒܘܼܬ ܕܝܼܵܗ̇. 39ܘܟܠܹܠܹܗ ܠܥܸܠܸܠ ܡܸܢܵܗ̇: ܘܢܓ̰ܘܼܠܹܗ ܒܐܫܵܬܵܗ̇: ܘܫܒ̣ܝܼܩܵܠܵܗ̇. ܘܕܲܪܣܵܥܲܬ ܩܸܡܠܵܗ̇ ܘܥܒܸܕܠܵܗ̇ ܚܸܠܡܲܬ ܐܸܠܵܝܗܝ. 40ܐܝܼܢܵܐ ܒܓܢܵܝܹܗ ܕܫܸܡܫܵܐ: ܟܠܵܝܗܝ ܐܵܢܝܼ ܕܐܝܼܬ ܗ݇ܘܵܘ ܠܗ݇ܘܿܢ ܡܸܪ̈ܥܝܹܐ: ܒܡܲܪ̈ܥܹܐ ܬܵܗܵܪܹ̈ܐ ܬܵܗܵܪܹ̈ܐ: ܡܘܼܬَܝܵܝܠܗܘܿܢ ܠܟܸܣܠܹܗ. ܘܗ̇ܘ ܥܲܠ ܟܠ ܚܲܕَ ܡܸܢܵܝܗܝ ܡܲܬܸܒ̣ ܗ݇ܘܵܐ ܐܝܼܕܹܗ: ܘܒܵܣܸܡ ܗ݇ܘܵܐ ܠܗܘܿܢ. 41ܘܦܵܠܛܝܼ ܗ݇ܘܵܘ ܐܘܼܦ ܕܲܝܘܹ̈ܐ ܡ̣ܢ ܪܵܒܵܐ: ܟܲܕ ܡܲܩܘܸܚܝܼ ܗ݇ܘܵܘ ܘܐܵܡܪܝܼ: ܕܐܲܢَܬ ܝܼܘܸܬ ܒܪܘܿܢܹܗ ܕܐܲܠܵܗܵܐ. ܘܢܵܓ̰ܸܘܼ ܗ݇ܘܵܐ ܒܝܼܵܝܗܝ: ܘܠܹܐ ܫܵܒܸܩ ܗ݇ܘܵܐ ܠܗ݇ܘܿܢ ܠܗܲܡܙܘܼܡܹܐ: ܣܵܒܵܒ ܝܕܸܥܠܗܘܿܢ ܕܗ̇ܘ ܝܼܗ݇ܘܵܐ ܡܫܝܼܚܵܐ. 42ܘܟܲܕ ܗَܘܹܐܠܹܗ ܝܵܘܡܵܐ: ܦܠܸܛܠܹܗ ܐَܙܸܠܹܗ ܠܕܘܼܟܵܐ ܚܵܪܵܒܵܐ: ܘܟܸܢܫܹ̈ܐ ܛܵܥܝܼ ܗ݇ܘܵܘ ܠܹܗ: ܘܐ݇ܬܹܐܠܗܘܿܢ ܗܲܠ ܠܟܸܣܠܹܗ: ܘܩܲܡ ܕܵܒ̣ܩܝܼܠܹܗ ܕܠܵܐ ܐܵܙܸܠ ܗ݇ܘܵܐ ܡ̣ܢ ܠܟܸܣܠܵܝܗܝ. 43ܘܗ̇ܘ ܐَܡܝܼܪܹܗ ܐܸܠܵܝܗܝ: ܐܘܼܦ ܠܡܕܝܼܢܵܬܹ̈ܐ ܐ݇ܚܹܪ̈݇ܢܹܐ ܘܵܓ̰ܸܒ ܝ݇ܠܵܗ̇ ܕܡܲܫܚܸܕܢ ܡܲܠܟܘܼܬܹܗ ܕܐܲܠܵܗܵܐ: ܣܵܒܵܒ ܠܕܵܐܗܵܐ ܦܸܫܠܝܼ ܫܘܼܕܪܵܐ. 44ܘܗ̇ܘ ܡܲܟܪܘܿܙܹܐ ܗ݇ܘܵܐ ܓܵܘ ܟܢܘܼܫܝܵܬܹ̈ܐ ܕܓܠܝܼܠܵܐ.